Драгиша Ристовски има повеќе од 25 години практично искуство на различни позиции, од комерцијалист на терен до директор. Како тренер за деловни вештини почнал да работи пред повеќе од 15 години, а денес неговата експертиза е за директна продажба, преговарање, мотивација и лидерство на вработените. Тој е автор на 15 книги, меѓу кои и бестселерот „Губат само оние што не играат“. Работи како постојан советник за продажба за повеќе реномирани компании низ целиот регион. Досега има основано 3 академии, една за комерцијални комуникации, за менаџерски вештини и минатата година ја основа Академијата за бизнис-знаење и вештини. Драгиша е еден од основачите на системот Lyceum, кој создаде иновативна софтверска апликација која содржи единствен систем за мерење на компетенциите на вработените во продажбата и продажниот менаџмент. Покрај академиите, креатор е на 11 други програми за образование за бизнис-вештини, а досега има одржано повеќе од 3.000 обуки, семинари и предавања во сите земји од поранешна Југославија, каде што учествувале повеќе од 60.000 луѓе.

Никола Бароли е роден и израснат во Белград. По своето школување во Америка и во Србија почнува кариера во компанијата „Проктер & Гембел“ во Романија, а потоа и во Босна и Херцеговина и во Србија каде што работел на развојот на логистички процес на дистрибутерите. По 4 години преминува во шведската козметичка компанија за директна продажба „Орифлејм“, каде што по 8 години работа како оперативен менаџер ја презема позицијата генерален директор за Србија и за сите други пазари во земјите од поранешна Југославија и се задржува 7 години. Од 2017 година ѝ се приклучува на водечката дистрибутивна компанија во Европа - „Орбико“, каде што работи како генерален директор на компанијата во Македонија. Бароли во својата секојдневна работа се води од тезата: „Луѓето се најголемо богатство на секоја компанија“ и континуирано работи на развојот и мотивацијата на своите тимови и давањето можност тие да покажат што знаат и умеат.

Патрик Зупанчич има повеќе од 25 години искуство во продажба, од кои 11 години на водечки позиции во продажба и комерција во мултинационалната компанија „Рекит Бенкисер адриатик“, во која спаѓаат светските брендови Finish, Vanish, Airwick, Cillit, Durex, Scholl, Strepsils и други. Две години бил директор на регионалниот синџир на продавници „Спортина Словенија“, за малопродажба и трговија на големо на модни брендови Armani, Boss, Tom Tailor, Esprit, Jack&Jones, Vero moda, Tally Weijl, Orsay, Bata. Потоа работи како Sales Manager за компанијата Coca-Cola HBC Slovenija. Од 2010 година тој е основач на агенцијата PROMO.FIL во Словенија и Хрватска, за унапредување на продажбата, merchandising, промоција и field monitoring.

Горан Теменугов со економија се занимава речиси 25 години. Својата кариера ја почнува во 1995 година во Македонската радио-телевизија каде што се задржува 4 години. Во 1999 година преминува во телевизијата „Канал 5“ и до 2001 работи како економски новинар за информативната редакција. Од 2001 до 2002 година работи на економски и политички вести и интервјуа за „Македонија денес“. Во 2003 година се враќа во МРТВ каде што работи во економската редакција, а од 2007 година до денес работи во „Алсат“. Во кариерата, освен прилози и емисии од областа на економијата, има и голем број интервјуа со гувернери на НБРМ, министри од областа на економијата и финансиите. Во текот на работењето ги следи процесите со стечаите на државните големи загубари, политиките на ММФ и СБ, како и енергетскиот сектор во Македонија.